त्रियुगा नगरपालिकाद्वारा अमृत झाको सुरक्षित रिहाइका लागि कूटनीतिक पहलको माग

2 महीना पहिले प्रकाशित

Esandhyakalin

उदयपुर , चैत्र ८ गते । उदयपुर जिल्लाको सदरमुकाम समेत रहेको त्रियुगा नगरपालिकाले इरानमा हिरासतमा रहेको भनिएका स्थानीय युवा अमृत झाको सुरक्षित रिहाइका लागि कूटनीतिक पहल गर्न नेपाल सरकार परराष्ट्र मन्त्रालयलाई औपचारिक रूपमा आग्रह गरेको छ ।

त्रियुगा नगरपालिकाका नगर प्रमुख बसन्त कुमार बस्नेतले २० चैत २०८२ (२० मार्च २०२६) मा परराष्ट्र मन्त्रालयलाई पत्र पठाउँदै त्रियुगा नगरपालिका–११, गाईघाट निवासी ३३ वर्षीय मरीन इन्जिनियर अमृत झा इरानी रिभोलुसनरी गार्डको नियन्त्रणमा परेको भन्ने सूचनाले परिवार, स्थानीय समुदाय, सिङ्गो नगरपालिका र देशनै चिन्तित बनेको उल्लेख गर्दै अमृत झाको तत्काल सुरक्षित रिहाइका लागि अनुरोध गर्नुभएको हो ।

नेपाल सरकार परराष्ट्र मन्त्रालयलाई पत्र लेख्दै नगर प्रमुख बस्नेतले झा दुबईबाट इरान इन्धन बोकेर फर्किने क्रममा पर्सियन गल्फस्थित होर्मुज जलडमरू नजिकै नियन्त्रणमा परेका भन्ने जानकारी प्राप्त भएको उल्लेख गर्नुभएको छ । त्यसयता उनको अवस्था र सुरक्षाबारे स्पष्ट सूचना नआएकोले परिवार तथा स्थानीय समुदायमा ठूलो चिन्ता बढेको नगरपालिकाले जनाएको छ ।

नगरपालिकाले परराष्ट्र मन्त्रालयमार्फत इरान सरकारसँग आवश्यक कूटनीतिक पहल गरी झाको सुरक्षा सुनिश्चित गर्न तथा यथाशीघ्र रिहाइका लागि पहल गर्न अनुरोध गरेको छ ।

झाका बुवा र आमा त्रियुगा नगरपालिका–११ मै बसोबास गर्दै आएका छन् । नगरपालिकाले झाको सुरक्षित स्वदेश फर्काइका लागि आवश्यक पहल जारी राख्ने समेत जनाएको छ ।

साभार : रेडियो नेपाल