इजरायलले भन्यो- हामी युद्धमा गयौँ, हमासको आक्रमणबाट २२ जनाको मृत्यु

2 वर्ष पहिले प्रकाशित

Esandhyakalin

काठमाडौं,असोज २० गते । इजरायलले प्यालेस्टाइनको हमासविरुद्ध शनिवार युद्धको घोषणा गरेसँगै मध्यपूर्वमा अशान्ति मच्चिएको छ ।प्यालेस्टिनी विद्रोहीहरूले इजरायलमाथि रकेट आक्रमण गरी २२ जनाभन्दा बढीको हत्या गरेपछि इजरायलले युद्ध घोषणा गरेको हो ।इजरायलका प्रधानमन्त्री बेन्जामिन नेतान्याहुले देश युद्धमा रहेको घोषणा गरेका छन् । उनले यसबाट हमासले ठूलो मूल्य चुकाउने चेतावनी समेत दिएका छन् ।इजरायलमा काम गर्ने नेपालीहरू अहिलेसम्म सबै सुरक्षित रहेको खबर प्राप्त भएको जेरुसेलमबाट नेपाल प्रेसकर्मी निता राउतले जनाएकी छन् ।उनले आफू अहिले एक नर्सिङ होमभित्र रहेको र बाहिर बमको आवाजहरू आइरहेको बताइन् ।उनका अनुसार अहिलेसम्म इजरायलमा रहेका नेपालीहरू सुरक्षित रहेको खबर छ । रकेट आक्रमणमा दक्षिणी क्षेत्रको एक कृषि फार्ममा कार्यरत नेपाली कृषि विद्यार्थी घाइते भएको खबर आएपनि स्वतन्त्र पुष्टि भइसकेको छैन ।

उनी राजदूतावाससँग सम्पर्कमा छिन् । उनका अनुसार कतिपय कम्पनीले सबै नेपालीलाई एकै ठाउँमा राखेका छन् ।शहरभित्रै छिरेर प्यालेस्टिनी उग्रवादीहरुले हमला गरेकाले बाहिर निस्कने अवस्था नरहेको नेपाल प्रेसकर्मी राउतले बताएकी छन् ।इजरायली सेनाले अहिले गाजामा हवाई कारबाही थालेको छ ।हमासका सैन्य कमाण्डर मोहम्मद डैफले हमास मिडियामा सम्बोधन गर्दै इजरायलमाथिको आक्रमण सुरू भएको बताएका थिए ।

उनले जुनसुकै ठाउँमा रहेका प्यालेस्टाइनीहरूलाई लडाइँमा भाग लिन आह्वान गरेका थिए ।‘यो संसारमा भएको अन्तिम अतिक्रमणलाई समाप्त गर्ने विशाल लडाइँको दिन हो,’ उनले भनेका छन् ।इजरायलमाथि ५ हजार रकेट प्रहार गरिएको उनको दाबी छ । हमास र इजरायलबीच सन् २०२१ मा पछिल्लो लडाइँ भएको थियो । उक्त लडाइँ १० दिनसम्म चलेको थियो ।