प्रधानमन्त्री कप : आजका खेलमा लुम्बिनी र सुदूरपश्चिम विजयी

4 महीना पहिले प्रकाशित

Esandhyakalin

जनकपुरधाम, चैत्र ९ गते । एक दिवसीय प्रधानमन्त्री कप क्रिकेट प्रतियोगिता अन्तरगत आज मधेश प्रदेशमा भएको दुई खेलमा लुम्बिनी र सुदूरपश्चिम प्रदेश विजयी भएका छन् ।

जनकपुरधाम स्थित निर्माणाधीन रामजानकी बहुउद्देश्यीय रङ्गशालामा भएको खेलमा लुम्बिनीले कोशी प्रदेशलाई १४८ रनको फराकिलो रन अन्तरले र पर्साको वीरगञ्जस्थित नारायणी रङ्गशालामा भएको अर्को खेलमा सुदूरपश्चिमले कर्णाली प्रदेशलाई ४ विकेटले हराएको हो ।

जनकपुरधाममा टस हारेर ब्याटिङ गरेको लुम्बिनी प्रदेशले कप्तान देव खनालको ९२ र सन्तोष यादवको ४८ रनको मद्दतले ५० ओभरमा २४९ रन बनाएको थियो । २५० रनको लक्ष्य पछ्याएको कोशीले ३१.४ ओभरमा सबै विकेट गुमाउँदै १०१ रन मात्र बनाउन सक्यो । कोशीको तर्फबाट अंकित सुवेदीले सर्वाधिक ३० रन बनाए ।

बलिङतर्फ लुम्बिनीका सन्तोष यादवले ४, राजेन्द्र बलमले ३, निर्मल गुरुङले २ र सन्देश थापाले १ विकेट लिए । ४८ रन र ४ विकेट लिएका लुम्बिनी प्रदेशका सन्तोष म्यान अफ द म्याच भएका छन् ।

यस्तै, वीरगञ्ज स्थित भएको खेलमा सुदूरपश्चिमले कर्णाली प्रदेशलाई ४ विकेटले हराएको छ । टस हारेर पहिला ब्याटिङ गरेको कर्णालीले ३२ ओभरमा सबै विकेट गुमाउँदै १ सय १९ रन बनाएका थिए । कर्णालीको तर्फबाट विपिन रावलले ३३ तथा सुनिल धमलाले २८ रन बनाएका थिए ।

बलिङमा कर्णालीका हेमन्त धामीले ७ ओभरमा १६ रन खर्चेर ६ विकेट लिएका थिए । १ सय २० को लक्ष्य पाएको सुदूरपश्चिमले २९.२ ओभरमा ६ विकेट गुमाउँदै जित निकालेको हो ।

सुदूरपश्चिमको तर्फबाट किरण ढगुन्नाले सर्वाधिक २६, खडक बोहोराले २३ रन बनाएर आउट भएका थिए । मिलन बोहोराले १८ र शेर मल्लले १० रनमा नट आउट रहँदा टोलीले जित निकालेको हो । कर्णालीका अनुज चनारा र दिवान पुनले समान २ विकेट लिए । ६ विकेट लिएका धामी म्यान अफ द म्याच भएका थिए । प्रधानमन्त्री कप अन्तरगतको पहिलो र दोस्रो खेल वर्षाको कारण रद्द भएको थियो ।

साभार : रेडियो नेपाल