बारामा बाघले एक जनाको ज्यान लियो

13 दिन पहिले प्रकाशित

Esandhyakalin

वीरगन्ज,असार ४ गते । बाराको जीतपुरसिमरा उपमहानगरपालिकामा बाघको आक्रमणबाट एक जनाको ज्यान गएको छ । मङ्गलवार दिउँसो ४ बजेदेखि हराइरहेका जीतपुरसिमरा–२१ का ५० वर्षीय चन्द्र बहादुर भोलनको शव बुधवार बिहान क्षतविक्षत फेला परेको हो ।

भोलनको शव जीतपुरसिमरा–२२ स्थित दक्षिणकाली सामुदायिक वन क्षेत्रको रातोमाटे अठेर खोल्चाको जंगलमा बुधवार बिहान करिब ७ः३० बजे फेला परेको थियो । स्थानीय युवाहरूले खोजी गर्ने क्रममा बाघले शरीरका विभिन्न अंगहरु खाएर क्षतविक्षत पारेको अवस्थामा शव फेला परेको थियो ।

भोलन मंगलबार दिउँसो ४ बजे बाख्रा चराउन भनी घरबाट जंगल गएका थिए । साँझसम्म पनि उनी र बाख्रा घर नफर्किएपछि परिवार र स्थानीयले राति ११ बजेसम्म खोजी गरेका थिए, तर फेला पार्न सकेनन् ।

घटनास्थलमा बाघको ठूलो पञ्जाको डोबहरू पनि देखिएको स्थानीयले बताएका छन् । घटनाको जानकारी पाएलगत्तै प्रहरीको टोली, जनप्रतिनिधि र स्थानीयहरू घटनास्थल पुगेका छन् र घटनाबारे थप अनुसन्धान भइरहेको प्रहरीले जनाएको छ । दिदीभिनाजुको घरमा बस्दै आएका भोलन अविवाहित थिए ।

बाख्रा चराउन गएका उनी साँझ ६ बजेसम्म पनि नफर्केपछि राती १ बजेसम्म प्रहरी, स्थानीय र वनका कर्मचारी मिलेर खोजी गरेका थिए ।

फेरि बिहान त्यहाँ पुगेर खोज्दा बाघले मान्छे खाइरहेको अवस्थामा फेला परेको थियो ।

अहिले निकुञ्ज, प्रहरी र स्थानीय घटनास्थलमा छन् । मुचुल्का उठाउने काम भइरहेको जीतपुर सिमरा उपमहानगर वडा नम्बर २१ का वडाध्यक्ष सुवास श्रेष्ठले जानकारी दिए ।

साभार : नेपाल प्रेस