कांग्रेस महाधिवेशनमा नीति, विधान संशोधन र संरचनागत सुधार मुख्य एजेन्डा

2 घन्टा पहिले प्रकाशित

Esandhyakalin

काठमाडौं, असाेज १७ : नेपाली कांग्रेसको १५औँ महाधिवेशन भोलि (आइतबार) काठमाडौंको टुँडिखेल खुलामञ्चमा उद्घाटन हुने भएको छ ।

कांग्रेस पत्रकार सम्मेलनमा बोल्दै प्रवक्ता देवराज चालिसेले पार्टीको १५औँ महाधिवेशनबाट आगामी पाँच वर्षका लागि कांग्रेसले लिने नीति, कार्यक्रम र राजनीतिक मार्गचित्र स्पष्ट हुने बताएका छन् । उनले कांग्रेसले नेपालको राजनीतिक सुधारको प्रक्रियामा कसरी अघि बढ्ने भन्ने विषयमा महाधिवेशनबाट महत्वपूर्ण निर्णय लिने बताए ।

उनले पार्टीलाई व्यवस्थित, सुदृढ र सबल बनाउने विषयमा पनि महाधिवेशनमा गहन छलफल हुने जानकारी दिए । पार्टीको संरचनागत सुधारसँगै विधान संशोधनको प्रक्रियामा समेत महाधिवेशन प्रवेश गर्ने उनले बताए ।

उनले कांग्रेस सभापतिले पार्टी आगामी पाँच वर्ष कुन बाटोमा अघि बढ्ने भन्ने विषयलाई कार्यपत्रमार्फत प्रस्तुत गर्ने बताए ।

सभापतिको कार्यपत्रमा नेपालको समग्र राजनीतिक अवस्था, अर्थनीति, उत्पादन वृद्धि, रोजगारी सिर्जना तथा विदेश नीतिसहितका विषयमा कांग्रेसको दृष्टिकोण प्रस्तुत हुने उनले बताए ।

उनले यही स्थानमा बीपी कोइरालाले निर्वासनबाट स्वदेश फर्किएपछि पहिलो सार्वजनिक सम्बोधन गरेको र २०४६ सालको जनआन्दोलन सफल भएपछि गणेशमान सिंहले निरंकुश सत्ताको अन्त्यको घोषणा गरेको उल्लेख गरे ।

उनले महाधिवेशनको प्रक्रियाबाट करिब ५० हजार नयाँ पुस्ताका युवाहरू विभिन्न जिम्मेवारीमा आएको र उनीहरूसहित सात हजारभन्दा बढी प्रतिनिधि महाधिवेशनमा सहभागी हुने बताए । उनका अनुसार ३५ वर्षमुनिका युवा, लोकतन्त्र सेनानी, श्रमिक तथा पेशागत समूह र विदेशमा रहेका नेपालीलाई समेत पहिलोपटक केन्द्रीय समितिमा प्रतिनिधित्वको अवसर दिइने छ ।

कांग्रेसको १५औँ महाधिवेशनको मूल मन्त्र ‘नयाँ कांग्रेस, नयाँ संकल्प’ रहेको प्रवक्ता चालिसेले बताए । महाधिवेशनका छलफल सत्रमा नयाँ संकल्पका विषयमा गहन छलफल गरी त्यसको कार्यान्वयनको खाका तयार गरिने उनले बताए ।

उनले महाधिवेशनले कांग्रेसमा विधि र पद्धतिको निर्माणसँगै लोकतन्त्रलाई नयाँ पुस्तासँग जोड्ने, सुशासनलाई राज्यको संस्कार बनाउने र युवालाई भविष्यको आशा देखाउने राष्ट्रिय संकल्प अघि बढाउने जानकारी दिए ।

कांग्रेसले विगतमा धेरै इतिहास निर्माण गरेको उल्लेख गर्दै चालिसेले अब नयाँ इतिहास निर्माण गर्ने दाबी गरे । उनले बीपी कोइरालाको विचारलाई इतिहासमा सीमित नराखी भविष्यसँग जोड्ने र देशको समृद्धिको वैचारिक आधारका रूपमा बीपी विचारलाई अघि बढाउने बताए ।

उनले महाधिवेशनमा सहभागी हुन देश तथा विदेशबाट प्रतिनिधिहरू काठमाडौं आउने क्रम जारी रहेको उल्लेख गरे ।

आजदेखि पार्टी केन्द्रीय कार्यालय सानेपामा महाधिवेशन प्रतिनिधिको दर्ता प्रक्रिया सुरु भएको छ । प्रतिनिधिहरूले सहभागिता दर्ताका लागि प्रतिव्यक्ति ३ हजार ५ सय रुपैयाँ बुझाउनुपर्ने व्यवस्था गरिएको छ ।

साभार: काठमाडौं प्रेस