कार्तिक पूर्णिमामा कमला नदी स्नान: नेपाल-भारत सम्बन्धलाई प्रगाढ बनाउने धार्मिक परम्परा

2 वर्ष पहिले प्रकाशित

Esandhyakalin

जनकपुरधाम, कार्तिक २९ गते । नेपाल र भारतबीचको सम्बन्ध साँस्कृतिक, धार्मिक, र ऐतिहासिक रूपमा गहिरो र नजिकको छ। यी दुई देशका जनताबीच धेरै धार्मिक परम्पराहरूले निकटता थप्दै आएका छन्, र कार्तिक पूर्णिमामा कमला नदीमा स्नान गर्ने परम्पराले यस सम्बन्धलाई अझ प्रगाढ बनाउँछ।

यस अवसरमा नेपाल भारत खुला सिमा संवाद संस्थाले, साधुसंतहरूको लागि मधेस प्रदेश सहसंयोजक दीपक यादवको संयोजनमा साधु सम्मान र भण्डाराको आयोजना गर्‍यो। करीब २५० साधुसंतहरूको लागि च्युरा, दही, चिनी, तरकारी र अचारको विशेष भोजन (भण्डारा) आयोजना गरिएको थियो, जसले नेपाल र भारतका साधुसंतहरूको सम्मान अभिवृद्धि गरेको छ।

संस्थाका अध्यक्ष राजीव झाले कार्तिक पूर्णिमाको धार्मिक महत्त्वबारे चर्चा गर्दै भने, "कार्तिक पूर्णिमा हिन्दू धर्मको पवित्र पर्व हो, जसमा विशेषगरी स्नान, धार्मिक अनुष्ठान, र पूजापाठ गरिन्छ। यसलाई ‘देव दिवाली’ का नामले पनि चिनिन्छ। नेपालका श्रद्धालुहरूले कमला नदीमा स्नान गरेर पुण्य प्राप्त गर्ने मान्यता राख्दछन्, जहाँ यो अवसरमा नेपाल र भारतका बिभिन्न स्थानबाट श्रद्धालुहरूको सहभागिता रहन्छ।”

सहसंयोजक दीपक यादवले नेपाल-भारत सम्बन्धमा कमला नदी स्नानको महत्त्वलाई जोड्दै भने, “कमला नदी दुवै देशका जनताको साझा सांस्कृतिक सम्पत्ति हो। कार्तिक पूर्णिमाको यस विशेष स्नानले दुई देशका जनताबीच सद्भाव र सांस्कृतिक आदानप्रदानलाई थप बलियो बनाउँछ।”

नेपाल र भारतबीच धार्मिक पर्यटनको विकासमा कमला नदी स्नानको महत्त्वबारे संस्थाका सचिव कृष्ण कुमार साहले बताए। उनका अनुसार, "प्रत्येक वर्ष मेला भर्न आउने हजारौं तीर्थयात्रीहरूले स्थानीय पर्यटनलाई चलायमान बनाउने काम गर्छन्। यस पर्वका लागि दुई देशका स्थानीय प्रशासनले मिलेर काम गर्ने भएकाले, यो पर्व दुई देशबीचको प्रशासनिक सम्बन्धलाई पनि बलियो बनाउँछ।”

सतोखर घाट मन्दिरका महन्त श्री शिव दयाल दास बाबाले कार्तिक पूर्णिमाको कमला नदी स्नानलाई नेपाल-भारत सम्बन्धलाई अझ गहिरो बनाउने साधनको रूपमा वर्णन गरे। धार्मिक र सांस्कृतिक सहकार्यको प्रतीक यस पर्वले दुई देशका जनताबीचको आत्मीयता र एकताको भावना बढाउँछ भन्ने विश्वास व्यक्त गरे।

कार्यक्रममा सबैला नगरपालिकाका मेयर, वडाध्यक्ष, क्लोथ बैंक नेपालका धनेश्वर ठाकुर लगायत स्थानीय व्यक्तित्वहरूको सहभागीता रहेको थियो, जसले दुई देशबीचको सम्बन्धलाई जनस्तरमा प्रगाढ बनाएको छ।