क्लोथ बैंक नेपालले विपन्न वर्गलाई न्यानो कपडा वितरण गरी मानवीय सेवामा योगदान पुर्‍यायो

6 दिन पहिले प्रकाशित

Esandhyakalin

जनकपुरधाम, मंसिर २६ गते । क्लोथ बैंक नेपालले विगत ६ वर्षदेखि आर्थिक अभावमा परेका व्यक्तिहरूलाई सहयोग गर्दै आएको छ। संस्थाले नयाँ लुगा, अक्सिजन सिलिन्डर, औषधि वितरण, स्वास्थ्य शिविर सञ्चालन जस्ता विभिन्न सामाजिक कार्यहरू गर्दै आएको छ। हालै, संस्थाले जनकपुरधाममा रहेका महिला हिंसा पीडित, विपन्न बालबालिका र एक परिवारलाई न्यानो कपडा वितरण गरेको छ।

ओरेक नेपालद्वारा सञ्चालित सेफ हाउसका महिला हिंसा पीडितहरूलाई १४ थान नयाँ जाडोको लुगा प्रदान गरिएको छ। यसैगरी, विजय मलिकको छोराको मुन्डन कार्यक्रममा बच्चा र परिवारका सदस्यहरूका लागि १० थान जाडोका लुगा वितरण गरिएको छ। त्यस्तै, जनकपुरधाम वडा नं. ६ मा रहेको अलजामिया अलतुल हन्फी अलतुल गोसिया मदरसामा अध्ययनरत विपन्न बालबालिकाहरूका लागि ४० थान ज्याकेट वितरण गरिएको छ। दाता साबिर हुसेन, उनका भाइ जुल्फिकार हुसेन र डा. बिपिन झाको सहयोगमा उपलब्ध गराइएका ती ज्याकेट क्लोथ बैंक नेपाल धनुषाले हस्तान्तरण गरेको हो।

ज्याकेट वितरण कार्यक्रममा क्लोथ बैंक नेपालका पदाधिकारीहरू, नेपाल-भारत खुला सीमा संवाद समूहका पदाधिकारीहरू, मदरसा अध्यक्ष, जामा मस्जिद जनकपुरधामका अध्यक्ष लगायतको उपस्थिति रहेको थियो। कार्यक्रममा क्लोथ बैंक नेपालका अध्यक्ष डा. राजीव झा र सचिव मनिष श्रीओमले संस्थाले गर्दै आएका सामाजिक कामहरूको जानकारी दिएका थिए। कोषाध्यक्ष रुबि झाका अनुसार, लुगा वितरण कार्यक्रममा लाभान्वित परिवार र बालबालिकाहरूले अत्यन्त खुसी व्यक्त गरेका छन्।

क्लोथ बैंक नेपाल धनुषाले आगामी दिनमा पनि यस्ता सामाजिक सेवाका कार्यक्रमहरूलाई निरन्तरता दिने प्रतिबद्धता व्यक्त गरेको छ। संस्थाले गरेको यस मानवीय सेवाको प्रशंसा गर्दै स्थानीय समुदायले समेत संस्थाप्रति आभार व्यक्त गरेका छन्।