जनकपुरधामको ऐतिहासिक तथा सार्वजनिक स्थलमा फोहर फाल्नेहरू धमाधम पक्राउ पर्दै

7 महीना पहिले प्रकाशित

Esandhyakalin

जनकपुरधाम, चैत ११ गते । मधेश प्रदेशको राजधानी समेत रहेको जनकपुरधाम उपमहानगरपालिकाले सार्वजनिक तथा धार्मिक स्थलमा फोहर फाल्नेलाई पक्राउ गरेर आर्थिक रुपमा दण्डित गर्न थालेको छ ।

जनकपुरधामको ऐतिहासिक जानकी मन्दिर, जनक मन्दिर, राममन्दिर सहित रामानन्द चोक, पिडारी चोक तथा अस्पताल रोडमा रातिको समयमा ठेलाबाट फोहर फाल्ने ३० जनालाई पक्राउ गरेर स्थानीय शासन ऐन अनुसार प्रति व्यक्ति ५ हजार १ सयको दरले जरिवाना तिराएको उपमहानगरपालिकाले जनाएको हो ।

सार्वजनिक तथा ऐतिहासिक स्थलहरूमा फोहर फाल्नेलाई लुकेर बसेको नगर प्रहरी तथा नेपाल प्रहरीको टोलीले पक्राउ गरेर रात भरि थुनामा राख्नुको साथै अर्को दिन कार्यालय खुलेपछि ५ हजार १ सय जरिवाना तिराएर छाड्न थालेको जनकपुरधाम उपमहानगरपालिकाका नगरप्रमुख मनोज कुमार साहले जानकारी दिनु भयो ।

उपमहानगरपालिकाले राति १० बजेपछि सडक पेटी तथा सडकको गल्लीमा लगेर होटल तथा अस्पतालको फोहर फाल्ने गरेको पाएपछि सफा जनकपुर राख्नका लागि अभियान चलाएको र यो अभियान निरन्तर रुपमा चल्ने नगरप्रमुख साहले बताउनु भयो । पक्राउ पर्नेमा जनकपुरधामका ठूला व्यापारीहरू पनि रहेका छन् ।

पछिल्लो समयमा उपमहानगरपालिकाले जथाभाबी रुपमा फोहर फाल्ने माथि कडा रुपमा प्रस्तुत भएपछि विगत केही दिन यता जनकपुरधामको सरसफाईमा सुधार हुन थालेको छ । नेपाल प्रेस काउन्सिलका उप–प्रशासकीय अधिकृत रहमतुल्ला मियाँले आफू केही वर्ष अगाडी आउँ जनकपुरधाम आउँदा अस्त व्यस्त तथा फोहर देखिने गरेकोमा अहिले निक्कै सफा र व्यवस्थित देखिएको बताउनु भयो ।

जनकपुरधामको भ्रमणमा आउने पर्यटकहरूले पनि जनकपुरधाममा अहिले सरसफाईमा सुधार भएको जनाएका छन् । विश्वका हिन्दुहरूका लागि ऐतिहासिक तथा धार्मिक महत्वको जनकपुरधामलाई सफा र सुन्दर बनाउने काम हरेक जनकपुरधाम बासीको रहेको नगरप्रमुख साहले बताउनु भयो । जनकपुरधाम फोहर शहर भएको भनेर प्रचार गर्नेलाई जथाभाबी फोहर नफालेर कामले जवाफ दिनका लागि आम जनकपुरधाम बासीसँग उपमहानगरपालिकाले अपिल पनि गरेको छ ।

साभार ः रेडियो नेपाल