एमाले धनुषा अधिवेशनमा झडप, रड प्रहारबाट तीन जनाको टाउको फुट्यो

1 वर्ष पहिले प्रकाशित

Esandhyakalin

जनकपुरधाम, वैशाख २३ गते । नेकपा एमाले जिल्ला अधिवेशनमा पुनः झडप भएको छ । झडपमा केही एमाले कार्यकर्ता घाइते भएका छन् । एमाले सचिव रघुवीर महासेठ र केन्द्रीय सदस्य उमाशंकर अरगरिया समूहबीच झडप भएको हो । झडपका क्रममा एक अर्कालाई रड प्रहार गरेका हुन् ।रड प्रहारबाट राजन यादव, सत्यनारायण महासेठ र महेश दासको टाउको फुटेको छ । अन्य कैयौं कार्यकर्तालाई सामान्य चोट लागेको छ । अधिवेशनस्थलमा ठूलो संख्यामा सुरक्षाकर्मी परिचालन भएपनि त्यहाँको अवस्था तनावग्रस्त छ ।

विधान विपरीत परेको उम्मेदवारी खारेज गरेर शान्तिपूर्ण ढंगले मतदान प्रक्रिया अगाडी बढाउनुपर्ने अरगरिया पक्षको अडान थियो । तर रघुवीर समूहले उम्मेदवारी खारेज गराउन नहुने भन्दै तोडफोडमा उत्रेपछि झडप भएको अधिवेशन प्रतिनिधिहरु बताउँछन् ।

जनकपुरधामस्थित महेन्द्र नारायण निधी मिथिला संस्कृति भवनको सभाहलभित्र सुरुमा कुटाकुट भएको थियो । कुटाकुटपछि अरगरिया समूह भित्रै धर्ना बसेका थिए भने रघुवीर समूह बाहिर प्रदर्शन गरिरहे ।

कुटाकुटपछि दुबै पक्षका नेताहरु छलफलमा बसेका बेला बाहिर पुनः झडप भएको अध्यक्षका उम्मेदवार लक्ष्मीनारायण यादवले बताए । उनले भने, ‘भित्रबाट बाहिर निस्किने वित्तिकै हाम्रो पक्षका कार्यकर्तालाई कुट्न थालेको छ ।’

उनका अनुसार आजको लागि मतदान प्रक्रिया स्थगित भएको छ ।