म्याथमेटिक्स ओलम्पियाड विजेता मिश्र सम्मानित

1 वर्ष पहिले प्रकाशित

Esandhyakalin

जनकपुरधाम ,जेठ ५ गते । तुर्कमेनिस्तानमा आयोजित दोस्रो अन्तर्राष्ट्रिय म्याथमेटिक्स ओलम्पियाडमा कास्य पदक जितेका जनकपुरधामका १९ वर्षीय आशिष मिश्रलाई मधेस प्रदेश सरकारले आज सम्मान गरेको छ ।

मधेश प्रदेशका मुख्यमन्त्री सतिश कुमार सिंहले मुख्यमन्त्री तथा मन्त्रिपरिषद्को कार्यालयमा आयोजित विशेष कार्यक्रममा नेपालको प्रतिनिधित्व गर्दै सफलता प्राप्त गरेका मिश्रलाई सम्मान गर्नुभएको हो ।

मुख्यमन्त्री सिंहले मधेसको भूमि हिरा उत्पादन गर्ने ठाउँ रहेको भन्दै हिराको खोजी गर्न जरुरी रहेको बताउनुभयो । उहाँले मधेसमा यस्ता प्रतिभा धेरै रहेकोमा त्यस्ता प्रतिभालाई बाहिर ल्याउन संघ सरकार, प्रदेश सरकार तथा स्थानीय सरकारले काम गर्नुपर्ने धारणा पनि राख्नुभयो ।

कास्य पदक विजेता मिश्रले आफूभन्दा पछाडिका पुस्तालाई किताबको ज्ञानमा मात्र सीमित नहुन आग्रह गर्दै यस्ता क्रियाकलापमा सहभागी हुन आग्रह गर्नुभयो । अप्रिल २१ देखि २६ तारिखसम्म तुर्कमेनिस्तानको शिक्षा मन्त्रालयको आयोजनामा भएको दोस्रो अन्तर्राष्ट्रिय म्याथमेटिक्स ओलम्पियाडमा करिब तीन सय भन्दा बढी विद्यार्थीहरूबिच व्यक्तिगत तथा समूहगत प्रतिस्पर्धा भएको थियो ।

अन्तर्राष्ट्रिय म्याथमेटिक्स ओलम्पियाडमा पहिलो पटक नेपाली विद्यार्थीले सहभागिता जनाएका थिए भने पहिलो पटक सहभागी हुँदै कस्य पदक जित्न सफल भएको हो । यससँगै उनी ९ जुलाईदेखि २१ जुलाई २०२५ सम्म अस्ट्रेलियामा आयोजना हुन लागेको ६६ औँ अन्तर्राष्ट्रिय म्याथमेटिक्स ओलम्पियाडमा भाग लिन जाने छन् ।

साभार : रेडियो नेपाल