मधेश प्रदेश सरकारद्वारा राष्ट्रिय शिक्षा सम्मेलनको आयोजना

8 महीना पहिले प्रकाशित

Esandhyakalin

जनकपुरधाम ,जेठ १९ गते । मधेश प्रदेशको शिक्षाको स्तर माथि उकास्ने उद्देश्यले मधेश प्रदेशका शिक्षा तथा संस्कृति मन्त्रालयको आयोजनामा आषाढको १० र ११ गते राष्ट्रिय शिक्षा सम्मेलन हुने भएको छ ।

शिक्षा सम्मेलनको बारेमा जानकारी दिने उद्देश्यले आज मन्त्रालयमा आयोजित पत्रकार सम्मेलनमा शिक्षा तथा संस्कृति मन्त्री रानी शर्मा तिवारीले सम्मेलनका विभिन्न विषयमा जानकारी दिनुभयो । सम्मेलनमा शिक्षा क्षेत्रका विज्ञहरू, सामुदायिक क्षेत्रको शिक्षामा सुधारको पक्षमा उदाहरणीय काम गरेका शिक्षक, प्रधानाध्यापक तथा शिक्षा प्रेमीहरू सहभागी हुनुहुनेछ ।

जनकपुरधाममा हुने राष्ट्रिय शिक्षा सम्मेलन प्रदेश सरकारले औपचारिक रुपमा पहिलो पटक गर्न लागेको हो । राष्ट्रिय शिक्षा सम्मेलनमा विभिन्न विषयहरूमा शोधपत्र प्रस्तुति गर्नुका साथै ती शोधपत्रहरूमा बहस संवाद गर्ने गरि योजनाको निर्माण गर्ने काम भइरहेको मन्त्री तिवारीले जानकारी दिनुभयो । शिक्षा सम्मेलनको मूल उद्देश्य शिक्षा क्षेत्रमा नीति निर्माण, योजना कार्यान्वयन, तथा समन्वयको नयाँ परिदृश्य तयार गर्नु नै रहेको शिक्षामन्त्रीले बताउनुभयो ।

करिब ३ सय जना शिक्षा क्षेत्रका विज्ञ तथा अगुवाहरू सहभागी हुने राष्ट्रिय शिक्षा सम्मेलनमा शिक्षण र सिकाइमा नव प्रवर्तनात्मक दृष्टिकोण, शिक्षा नीति र शासन प्रणाली, समावेशी र न्याय संगत शिक्षा प्रणाली, शिक्षामा डिजिटल रूपान्तरण र समुदाय संलग्नता तथा सहकार्य सहितका विषयमा छलफल हुने मन्त्रालयका निमित्त सचिव दिलीप कुमार ठाकुरले जानकारी दिनुभयो ।

साभार : रेडियो नेपाल