पत्रकार महासङ्घ मधेश प्रदेशको बैठक सम्पन्न

11 महीना पहिले प्रकाशित

Esandhyakalin

जनकपुरधाम ,जेठ ३१ गते । नेपाल पत्रकार महासङ्घ मधेश प्रदेश समितिको बैठकले स्वतन्त्र, सुरक्षित तथा मर्यादित पत्रकारिताको विकासको पक्षमा १३ बुँदे निर्णय गरि जनकपुरधाममा सम्पन्न भएको छ ।

बैठकले विगतदेखि उठाउँदै आएको मागहरूलाई प्रभावकारी कार्यान्वयनका लागि सरकार, सञ्चार संस्था तथा सरोकारवाला निकायहरूसँग प्रभावकारी कार्यान्वयनको लागि पुनः माग गरेको छ ।

बैठकले पत्रकारिताको मर्यादा कायम राख्न पत्रकारहरूलाई आचारसंहिता पालना गर्न र विवादमा नपर्ने गरी मर्यादित पत्रकारिता गर्न समेत आह्वान गरेको छ । आठ वटै जिल्लामा आवद्ध पत्रकार महासङ्घ सदस्यहरूको सदस्यता नवीकरण असार १५ भित्र गर्न र नवीकरण शुल्क प्रदेश समितिमा पठाउन अनुरोध गरिएको छ । साथै, कार्यालय व्यवस्थापन र उद्घाटनको तयारी गर्न निर्देशन दिइएको छ ।

सञ्चार माध्यमहरूलाई आत्मनिर्भर बनाउन कार्यसमिति सदस्यहरूले स्वैच्छिक मासिक आर्थिक सहयोग गर्ने निर्णय गरिएको छ । उक्त सहयोगलाई व्यवस्थित गर्न कोषाध्यक्षमार्फत कार्ययोजना ल्याउने निर्णय बैठकले गरेको छ ।

बैठकले प्रदेश सरकार समक्ष पत्रकारहरूको स्वास्थ्य तथा दुर्घटना बीमा अभियानका रूपमा सञ्चालन गर्न, छुटेकाहरूलाई समावेश गर्न र गैर पत्रकारको बीमा भएमा पुनरावलोकन गर्न माग गरेको छ ।

लोककल्याणकारी विज्ञापनका सन्दर्भमा प्रत्येक मिडियालाई कम्तीमा एक लाख रुपैयाँ बराबरको विज्ञापन सुनिश्चित गर्न आग्रह नेपाल पत्रकार महासङ्घ मधेश प्रदेश समितिको बैठकले गरेको महासचिव शैलेन्द्र महतो क्रान्तिले जानकारी दिनुभयो ।

आउँदो आर्थिक वर्ष २०८२-८३ का लागि प्रस्तुत गरिन लागेको प्रदेश सरकारको बजेटमार्फत यी मागहरू सम्बोधन गर्न आग्रह गरिएको छ ।

साभार : रेडियो नेपाल