जनकपुरमा वकिलहरूले पत्रकार कुटे, महासंघ मधेशका अध्यक्षसहित ४ जना घाइते

1 वर्ष पहिले प्रकाशित

Esandhyakalin

जनकपुरधाम ,श्रावण २७ गते । गुठी संस्थानसँग नेपाल पत्रकार महासंघ मधेश प्रदेशले लिजमा लिएको जग्गा कब्जा गर्दै वकिलहरुको समूहले पत्रकारहरुमाथि आक्रमण गरेका छन् ।

वकिलहरुको आक्रमणमा परी नेपाल पत्रकार महासंघ मधेश प्रदेशका अध्यक्ष श्याम बन्जारा, महासचिव शैलेन्द्र क्रान्ति, पत्रकार दिवाकर रायसहितका पत्रकारहरु घाइते भएका छन् । उनीहरु प्रादेशिक अस्पतालमा भर्ना भएका हुन् ।

महासचिव क्रान्तिको पैताला भाँचिएको छ । अस्पतालमा उपचाररत उनले भने, ‘हामीले प्रक्रिया पुर्याएर लीजमा लिएको जग्गा वकिलहरुले कब्जा गर्नुभयो । हामी त्यहाँ पुगेपछि सैयौंको संख्यामा रहेका वकिलहरुले आक्रमण गर्नुभयो । म पनि घाइते भए । मेरो खुट्टा क्रेक भएको छ । अहिले ब्यान्डेज गराउँदैछु ।’

अध्यक्ष बन्जाराको र दिवाकरको टाउकोमा चोट लागेको छ । अन्य पत्रकारहरुको पनि भागदौडमा चोटपटक लागेको छ । उनीहरुमाथि आक्रमण हुँदा प्रहरी समेत थिए । तर प्रहरीले केहि गर्न सकेनन् ।

भूतनाथ महादेवको दक्षितीर पत्रकार महासंघले गुठी संस्थानसंग ४ कठा जग्गा वार्षिक ३ लाख १ हजार १ सय रुपैयाँमा २० वर्षका लागि लिजमा लिएको छ । महासंघका महासचिव क्रान्तिका अनुसार साउन १९ मा महासंघ र गुठी संस्थानबीच जग्गाको सम्झौता भएको छ ।

तर नेपाल बार एसोसिएसन जनकपुरधामले साउन २० गते सूचना जारी गर्दै महासंगले लीजमा लिइसकेको उक्त जग्गामा गाडी पार्किङ गर्न कानुन व्यवसायीहरुलाई भनेको थियो ।

साभार : नेपाल प्रेस