मेधावी विद्यार्थीलाई आकर्षित गर्न “विद्यार्थी माझ लोक सेवा आयोग”

8 महीना पहिले प्रकाशित

Esandhyakalin

जनकपुरधाम ,भदौ १८ गते । सार्वजनिक प्रशासनलाई सक्षम तथा सबल बनाउनका लागि लोकसेवा आयोगले विभिन्न विश्व विद्यालयका मेधावी विद्यार्थीहरूलाई सरकारी सेवामा आकर्षित गर्नका लागि “विद्यार्थीमाझ लोक सेवा आयोग” कार्यक्रम गरिरहेको छ ।

आयोगको ७५ वर्ष प्रवेशको अवसर पारेर वर्ष भरि नै आयोजना हुने हीरक जयन्ती अन्तर्गतको विविध कार्यक्रम अन्तर्गत आज मधेश प्रदेशको राजधानी जनकपुरधाममा विभिन्न विश्व विद्यालयका विद्यार्थीहरूसँग संवाद तथा छलफल कार्यक्रम गरेको हो ।

निजामती सहित अन्य सार्वजनिक क्षेत्रको सेवालाई प्रभावकारी बनाउनका लागि मेधावी विद्यार्थीहरूलाई लोकसेवा आयोगको सेवा प्रवेश सम्बन्धी योग्यता परीक्षामा सहभागी हुनका लागि उत्प्रेरित गर्ने उद्देश्यले कार्यक्रमको आयोजना गरेको आयोगका सदस्य माधव वेल्बासेले जानकारी दिनुभयो ।

आयोगले सातै प्रदेशको राजधानीमा यस्तै कार्यक्रमको आयोजना गरेर लोकसेवा आयोगको सम्पूर्ण गतिविधि तथा सरकारी सेवाका विषयमा जानकारी दिने कार्यक्रम अन्तर्गत मधेश प्रदेशका ८ जिल्लाका विभिन्न विश्व विद्यालयमा विभिन्न विषयहरूमा अध्ययनरत रहेका विद्यार्थीहरूसँग छलफल तथा संवाद गरेका छन् ।

योग्यता, निष्पक्षता तथा स्वच्छता मूल भावनासहित अहिले लोकसेवा आयोगले सरकारी सेवामा प्रवेश गर्नका लागि विश्व विद्यालय तथा शिक्षक सेवा प्रवेशको परीक्षा छाडेर सबै सरकारी निकायको सेवा प्रवेश सम्बन्धी परीक्षा सञ्चालन गरेर योग्यता प्रणालीको आधारमा उम्मेदवारको सिफारिस गर्दै आएको हो ।

कार्यक्रममा जनकपुरधाम उपमहानगरपालिकाका प्रमुख मनोज कुमार साहले लोकसेवा आयोगको परीक्षा प्रणाली अहिले पनि निष्पक्ष भएको बताउँदै मधेश प्रदेशमा जनसङ्ख्या बढी भएकाले आम जनतालाई प्रभावकारी किसिमले सेवा प्रवाहका लागि कर्मचारीको दरबन्दी अपुग भएको बताउनुभयो ।

साभार : रेडियो नेपाला