काठमाडौंबाट उड्नासाथ टर्किसको दायाँ इन्जिनमा आगलागी, कोलकाता ‘डाइभर्ट’

8 महीना पहिले प्रकाशित

Esandhyakalin

काठमाडौं, माघ २१ : त्रिभुवन अन्तर्राष्ट्रिय विमानस्थलबाट टर्कीको इस्तानबुलका लागि उडेको टर्किस एयरलाइन्सको जहाजको दायाँ इन्जिनमा आगलागी भएको छ।

टर्किसको उडान नम्बर ‘टीएचवाई ७२७’ को जहाज त्रिभुवन विमानस्थलबाट बुधबार दिउँसो १:२८ बजे उडेको लगत्तै ४ मिनेटमा दायाँ इन्जिनमा आगलागी भएको विमानस्थलका महाप्रबन्धक टेकनाथ सिटौलाले जानकारी दिए ।

साे विमानमा टेकअफ गर्ने क्रममा एउटा इन्जिनमा समस्या देखिएपछि विमान भारतको कोलकातातर्फ डाइभर्ट गरिएको छ।

नेपाल नागरिक उड्डयन प्राधिकरण (क्यान)का सहप्रवक्ता ज्ञानेन्द्र भुलका अनुसार उडान नम्बर टीएचवाई–७२७ ले उडान भर्ने क्रममा एउटा इन्जिन बिग्रिएको जानकारी चालकदलले काठमाडौं टावरलाई गराएका थिए।

चालकदलले सिंगल इन्जिनमा उडिरहेको रिपोर्ट गरेपछि विमान काठमाडौंको आकाश क्षेत्र छाडेर धादिङ जिल्लाको धार्के क्षेत्रमाथि केही समय एउटा इन्जिनको भरमा फन्को लगाउँदै इन्जिनको अवस्था जाँच गरेको थियो।

जाँचका क्रममा दुवै इन्जिनमा सुरक्षित रूपमा लामो दूरीको उडान गर्न नसकिने निष्कर्षमा पुगेपछि चालकदलले इस्तानबुलको उडानलाई निरन्तरता नदिई भारतको कोलकातातर्फ डाइभर्ट गर्ने निर्णय गरेको हो।

वाइडबडी विमान भएकाले काठमाडौंमै फर्किन वा भैरहवा अवतरण गर्न सक्ने विकल्प भए पनि चालकदलले जोखिम नलिई कोलकाता डाइभर्ट गर्ने निर्णय गरेको बताइएको छ।

टर्किसको ‘ए३३०-३०३’ सिरिजको उक्त वाइड बडी जहाजले २ सय २५ यात्रु बोकेको थियो ।

साभार : काठमाडौं प्रेस