फुटपाथ अतिक्रमणविरुद्ध नागरिक दबाब सशक्त, ३१५ हस्ताक्षरसहित नगरप्रमुखलाई ज्ञापन

8 महीना पहिले प्रकाशित

Esandhyakalin

जनकपुरधाम, २५ माघ । जनकपुरधामका मुख्य सडक तथा बजार क्षेत्रमा बढ्दो फुटपाथ अतिक्रमणविरुद्ध सञ्चालन गरिएको हस्ताक्षर अभियानअन्तर्गत संकलित हस्ताक्षर आइतबार नगरप्रमुख मनोजकुमार साहलाई हस्तान्तरण गरिएको छ ।

पत्रकार ध्रुब झाको संयोजनमा सञ्चालन गरिएको उक्त अभियानमार्फत संकलित हस्ताक्षर जनकपुरधाम उपमहानगरपालिकाको कार्यालयमा आयोजित कार्यक्रममा नगरप्रमुख साहलाई बुझाइएको हो ।

अभियानमार्फत अव्यवस्थित व्यापार तथा फुटपाथ अतिक्रमण हटाउन स्थानीय सरकारलाई दबाब दिनु मुख्य उद्देश्य रहेको पत्रकार झाले बताए ।

३१५ जनाको संकलित हस्ताक्षर बुझ्दै नगरप्रमुख मनोजकुमार साहले जनकपुरधामलाई व्यवस्थित, सफा र नागरिकमैत्री शहर बनाउने प्रतिबद्धता व्यक्त गरे । उनले फुटपाथ र सडक आम नागरिकको साझा सम्पत्ति भएको उल्लेख गर्दै अतिक्रमणविरुद्ध उपमहानगरपालिकाले कडाइका साथ कारबाही गर्दै आएको बताए ।

‘पछिल्लो समय हामीले अभियानकै रूपमा फुटपाथ तथा सार्वजनिक स्थल अतिक्रमण हटाउँदै आएका छौँ । हालसम्म करिब १ हजारभन्दा बढी अतिक्रमणकारीमाथि कारबाही भइसकेको छ,’ नगरप्रमुख साहले भने, ‘अब पनि अव्यवस्थित व्यापार र गैरकानुनी संरचनामाथि सहनशीलता देखाइने छैन ।’

अभियानका संयोजक पत्रकार झाले विगत डेढ वर्षदेखि निरन्तर रूपमा फुटपाथ अतिक्रमणविरुद्ध आवाज उठाउँदै आएको स्मरण गर्दै नागरिक दबाबकै कारण स्थानीय सरकारले थप सक्रियता देखाउन थालेको बताए ।

‘पैदल यात्री सुरक्षित रूपमा हिँड्न पाउने वातावरण बनाउनु हाम्रो अधिकार हो । यो अभियान नागरिक अधिकारको संरक्षणका लागि हो,’ झाले भने, ‘आज नगरप्रमुखलाई हस्ताक्षर बुझाएर हामीले प्रशासनलाई अझ जिम्मेवार बनाउने प्रयास गरेका छौँ ।’

उनका अनुसार आगामी दिनमा पनि अनुगमन, सचेतना र दबाबमूलक कार्यक्रम निरन्तर सञ्चालन गरिनेछ ।