आज जनकपुरमा कांग्रेसको शक्ति प्रदर्शन, घोषणापत्र पनि सार्वजनिक हुँदै

7 महीना पहिले प्रकाशित

Esandhyakalin

काठमाडौँ ,फाल्गुन ६ गते । नेपाली कांग्रेसले फागुन २१ गतेको प्रतिनिधिसभा निर्वाचनलाई लक्षित गरेर तयार पारेको चुनावी घोषणापत्र आज जनकपुरधामबाट सार्वजनिक गर्दैछ । कांग्रेसले मधेशकेन्द्रित औपचारिक शक्ति प्रदर्शनसहित चुनावी घोषणापत्र सार्वजनिक गर्न लागेको हो ।

कांग्रेस मधेश प्रदेश सभापति तथा मधेशका मुख्यमन्त्री कृष्णप्रसाद यादवले मंगलबार पत्रकार सम्मेलन गरेर चुनावीसभाको तयारी सकिएको जानकारी दिए । उनका अनुसार मधेशका आठवटै जिल्लामा नेता–कार्यकर्तालाई सक्रिय रूपमा परिचालन गरिएको छ । कम्तीमा एक लाख जनसहभागिता सुनिश्चित गर्ने लक्ष्यसहित कार्यक्रमको व्यवस्थापन मिलाइएको छ ।

सभामा पार्टी सभापति गगन थापासहित शीर्ष नेतृत्वको उपस्थिति रहने जनाइएको छ । केन्द्रीय नेतृत्वको सहभागिताले मधेशमा कांग्रेसको चुनावी अभियानलाई थप गति दिने अपेक्षा गरिएको छ ।

सार्वजनिक गरिने घोषणापत्रमा मधेशको समग्र आर्थिक–सामाजिक रूपान्तरणलाई प्राथमिकतामा राखिएको पार्टीको दाबी छ । रोजगारी सिर्जना, कृषि आधुनिकीकरण, सिँचाइ तथा भण्डारण पूर्वाधार विस्तार, शिक्षा–स्वास्थ्य सेवाको गुणस्तर सुधार, सडक तथा अन्य संरचना निर्माण, लगानीमैत्री वातावरण र सुशासन जस्ता विषयलाई मुख्य एजेन्डा बनाइएको बताइएको छ ।

यादवले मधेशमा बढ्दो बेरोजगारी, कृषि उत्पादनको स्थिर अवस्था र आधारभूत सेवाको कमजोर प्रवाहलाई सम्बोधन गर्ने गरी नीति तथा कार्यक्रम तयार गरिएको स्पष्ट पारे । उनका अनुसार मधेशको आर्थिक रूपान्तरणबिना राष्ट्रिय समृद्धि सम्भव नहुने दृष्टिकोणले घोषणापत्र तयार पारिएको हो ।

सभास्थल आसपास सुरक्षा व्यवस्था कडा पारिएको छ । बाहिरी जिल्लाबाट आउने सहभागीका लागि यातायात तथा अन्य व्यवस्थापनसम्बन्धी तयारी पनि भइसकेको आयोजकले जनाएको छ ।

साभार : काठमाडौं प्रेस