मधेश प्रदेश सभाको बैठक चैत्र १५ गते बस्ने

7 महीना पहिले प्रकाशित

Esandhyakalin

जनकपुरधाम, चैत्र ९ गते । मधेश प्रदेश सभाको बैठक १५ गते बस्ने भएको छ । मधेश प्रदेशका सभामुख रामअशिष यादवको अध्यक्षतामा प्रदेश सभा सचिवालयमा आज बसेको सर्वदलीय बैठकले प्रदेश सभाको छैटौँ अधिवेशनको १४ औँ बैठक चैत्र १५ गते आइतबार बस्ने निर्णय गरेको हो ।

प्रदेश सभाको बैठकमा पेश गर्ने विभिन्न विषयहरूमा सर्वदलीय बैठकमा छलफल भएको छ । मधेश प्रदेश सभाको बैठकमा प्रदेश सभा सचिवालयमा दर्ता भएका मधेश प्रदेश सभा कार्यसञ्चालन नियमावली २०८२ को मस्यौदा समितिको प्रतिवेदन छलफलका लागि पेश गर्ने निर्णय भएको छ ।

यसका साथै विषयगत समितिको वार्षिक प्रतिवेदन, प्रदेश लोक सेवा आयोगको छैटौँ वार्षिक प्रतिवेदन र गाउँसभा, नगरसभा, जिल्ला सभा कार्यसञ्चालन कार्यविधि ऐन २०७७ संशोधन गर्ने विषयमा छलफल गर्ने निर्णय सर्वदलीय बैठकले गरेको मधेश प्रदेश सभाका सभामुख रामअशिष यादवले जानकारी दिनुभयो ।

प्रदेश सभाको बैठकमा प्रदेश नीति आयोग गठन तथा कार्यसञ्चालन ऐन २०७२ संशोधन गर्न बनेको विधेयक माथिको छलफल सम्बन्धि प्रस्ताव पेश गरिने भएको छ । प्रदेश सभाको जारी छैटौँ अधिवेशनमा मधेश प्रदेश सरकारले तयार पारेका केही अन्य विधेयकहरू पेश गर्ने विषयमा प्रदेश सरकारले तयारी गरिरहेको छ ।

साभार : रेडियो नेपाल