हराएका तथा भत्केका सीमा स्तम्भको चाँडै निर्माण गर्ने सहमति

7 महीना पहिले प्रकाशित

Esandhyakalin

जनकपुरधाम, चैत्र १० गते। मधेश प्रदेशका जिल्लाहरूलाई भारतीय सीमासँग छुट्टाउनका लागि निर्माण भएर विभिन्न कारणले हराएका सीमा स्तम्भहरूको पुनः निर्माण गरिने भएको छ ।

मधेश प्रदेशका ८ जिल्लाका साथै चितवन जिल्लाका प्रमुख जिल्ला अधिकारी, सुरक्षा निकायका प्रमुख, नापी कार्यालय तथा भवन निर्माण डिभिजन कार्यालयका प्रमुखहरूको सहभागितामा भारतको विहार राज्यको रक्सौलमा आज भएको संयुक्त बैठकले सो निर्णय गरेको धनुषाका प्रमुख जिल्ला अधिकारी प्रेम प्रसाद लुइँटेलले जानकारी दिनुभयो ।

भारतका पूर्वी चम्पारन जिल्लाका जिल्ला अधिकारीसहित सुरक्षा निकाय तथा सर्भे अधिकारीहरूको सहभागितामा २०७६ सालपछि भएको आज भएको बैठकले हराएका सीमा स्तम्भहरूको दुवै देशका सुरक्षा अधिकारी सहितका निकायले एकिन गरेर पुनः निर्माण गर्ने निर्णय भएको छ ।

मधेश प्रदेशका ८ जिल्लामा नेपाल भारतलाई छुट्टाउनका लागि साना तथा ठूला गरेर ५ हजार ३ सय १२ सीमा स्तम्भ छन्, जसमध्ये ४ सय ८५ सीमा स्तम्भ ठूला आकारका छन् ।

हराएको सीमा स्तम्भको एकिन भएपछि दुवै देशको सहमतिमा शीघ्र प्रक्रियाद्वारा पुनः निर्माण गर्ने बैठकले निर्णय गरेको धनुषाका प्रमुख जिल्ला अधिकारी लुइँटेलले जानकारी दिनुभयो ।

बैठकमा नेपाली पक्षको नेतृत्व सिरहा जिल्लाका प्रमुख जिल्ला अधिकारी सुरेन्द्र पौडेलले गर्नुभएको थियो भने भारतीय पक्षका नेतृत्व पूर्वी चम्पारन जिल्लाका जिल्ला अधिकारीले गर्नुभएको थियो ।

साभार : रेडियो नेपाल