रेडक्रस धनुषा शाखालाई केन्द्रको कडा नोटिस, स्पष्टीकरण नदिए विघटनको चेतावनी

3 महीना पहिले प्रकाशित

Esandhyakalin

जनकपुरधाम, १२ बैशाख । नेपाल रेडक्रस सोसाइटीको केन्द्रीय तदर्थ समितिले धनुषा जिल्ला शाखालाई वैधानिक दायित्व पालना नगरेको आरोपमा कडा स्पष्टीकरण सोध्दै जवाफ पेश गर्न निर्देशन दिएको छ ।

तोकिएको समयभित्र सन्तोषजनक स्पष्टीकरण नआए शाखा समिति नै विघटन गर्न सकिने चेतावनी दिइएको छ ।

केन्द्रीय कार्यालयले जारी गरेको पत्रमार्फत धनुषा शाखाका सभापति नरेशप्रसाद सिंहलाई सम्बोधन गर्दै सदस्यता विस्तार अभियान प्रभावकारी रूपमा सञ्चालन नगरेको, सदस्यताको अभिलेख अद्यावधिक नगरेको र संकलित शुल्क बैंक दाखिला नगरेको जस्ता गम्भीर त्रुटिहरू औंल्याएको हो ।

पत्रअनुसार, रेडक्रसको विधान २०२० (अठारौँ संशोधन २०८२ सहित) बमोजिम केन्द्रीय तदर्थ समितिको फागुन २४ गतेको बैठकले देशभर सदस्यता विस्तार अभियान सञ्चालन गर्ने निर्णय गरेको थियो ।

सो अभियान फागुन २५ देखि चैत २४ सम्म सञ्चालन गर्न सबै जिल्ला शाखाहरूलाई निर्देशन दिइएको थियो । यसका लागि केन्द्रीय कार्यालयले सामाजिक सञ्जाल, रेडियो तथा राष्ट्रिय पत्रिकामार्फत सार्वजनिक सूचनासमेत जारी गरेको थियो ।

तर, धनुषा शाखाले उक्त अभियानमा अपेक्षित सक्रियता नदेखाएको केन्द्रको आरोप छ । सदस्यता वितरण नगरेको, सदस्यहरूको विवरण अभिलेखमा अद्यावधिक नगरेको तथा सदस्यता शुल्क बैंकमा दाखिला नगरेको जस्ता कार्यहरूले संस्थाको विधान विपरीत काम भएको केन्द्रीय कार्यालयको निष्कर्ष छ ।

केन्द्रीय कार्यालयले यसअघि पनि पटक पटक पत्राचार, टेलिफोन सम्पर्क तथा कर्मचारी परिचालनमार्फत शाखालाई आवश्यक सहजीकरण गरेको दाबी गरेको छ ।

तर, ती प्रयासहरूबाट पनि अपेक्षित सुधार नदेखिएपछि बाध्य भएर स्पष्टीकरण सोधिएको जनाएको छ ।

केन्द्रीय तदर्थ समितिको चैत १५ गते बसेको ३५०औँ बैठकले धनुषा शाखालाई स्पष्टीकरण सोध्ने निर्णय गरेको थियो । उक्त निर्णयअनुसार, शाखाले वैधानिक दायित्व पूरा नगर्नुको कारण स्पष्ट रूपमा उल्लेख गर्दै जवाफ दिनुपर्नेछ ।

स्रोतका अनुसार, तोकिएको समयसीमाभित्र चित्तबुझ्दो स्पष्टीकरण नआए धनुषा जिल्ला शाखा समिति विघटन गरी नयाँ तदर्थ समिति गठन गर्ने प्रक्रिया अघि बढ्न सक्नेछ ।

उता, यस विषयमा धनुषा शाखाका पदाधिकारीहरूले औपचारिक प्रतिक्रिया दिएका छैनन् । तर, आन्तरिक विवाद र व्यवस्थापनगत कमजोरीका कारण अभियान प्रभावकारी रूपमा सञ्चालन हुन नसकेको हुनसक्ने अनुमान गरिएको छ

।

साभार: टुडे आवाज