विद्यापति पुरस्कार कोषद्वारा पाँच विधामा पुरस्कार घोषणा

12 महीना पहिले प्रकाशित

Esandhyakalin

जनकपुरधाम ,चैत १९ गते । मैथिली भाषा, साहित्य, संस्कृति र कलाको क्षेत्रमा विशिष्ट योगदान दिएका संस्था र व्यक्तिलाई वार्षिक रुपमा विद्यापति पुरस्कार कोषले प्रदान गर्दै आएको पाँच विधाको पुरस्कार दिने घोषणा गरेको छ ।

यस पटक २०८० तथा २०८१ को पुरस्कार विभिन्न व्यक्तित्व एवं संस्थालाई प्रदान गर्ने घोषणा गरेको कोषका अध्यक्ष रामबाबु चौधरी र सदस्य सचिव ध्रुव कुमार मण्डल अमातले आज जारी गर्नु भएको प्रेस विज्ञप्तिमा उल्लेख रहेको छ ।

कोषले वर्षेनी रुपमा प्रदान गर्दै आएको २ लाख धन राशिको नेपाल विद्यापति भाषा साहित्य पुरस्कार २०८० वाट मैथिली विकास कोष जनकपुरधाम र २०८१ को पुरस्कार प्राध्यापक भोलानाथ झालाई प्रदान गरिने भएको छ । उक्त पुरस्कारको रकम सहित सम्मानपत्र रहेको छ ।

यसै गरि १ लाख धन राशिको नेपाल विद्यापति भाषा संस्कृति पुरस्कार २०८० वाट राम कुमार मण्डल र २०८१ वाट दिपा मिथिला आर्ट ग्यालरीलाई प्रदान गरिने भएको छ । कोषले प्रदान गर्दै आएको १ लाखको नेपाल विद्यापति अनुसन्धान पुरस्कार २०८० वाट विनोद कुमार यादव र २०८१ वाट माला कुमारी कर्णलाई प्रदान गर्ने भएको छ ।

यसै गरि १ लाखकै नेपाल विद्यापति पाण्डुलिपि पुरस्कार २०८० वाट साहित्यकार उपप्राध्यापक श्याम सुन्दर शशी र २०८१ वाट शतकवि काशीकान्त झालाई प्रदान गर्ने भएको छ । कोषले १ लाख धन राशिकै नेपाल विद्यापति अनुवाद पुरस्कार २०८० वाट विद्याधर झा र २०८१ वाट पत्रकार एवं साहित्यकार श्यामसुन्दर यादवलाई सम्मानित गर्ने निर्णय गरेको छ ।

सबै जनालाई नेपाल विद्यापति पुरस्कार चयन समिति तथा कोषका सञ्चालक परिषद्को विभिन्न मितिमा गरेको निर्णय अनुसार चयन गरेर पुरस्कृत गरिने भएको विद्यापति पुरस्कार कोषले जनाएको छ ।