आसिफ र अनिलको अर्धशतकमा वेस्टइन्डिज एमाथि नेपाल ६ विकेटले विजयी

14 दिन पहिले प्रकाशित

Esandhyakalin

काडमाडाैं, वैशाख २२ : वेस्टइन्डिज एविरुद्धको ५ खेलको टि–२० सिरिजको अन्तिम खेलमा नेपाल विजयी भएको छ। शनिबार कीर्तिपुरस्थित टियू मैदानमा भएको खेलमा आसिफ सेख र अनिल साहले अर्धशतक प्रहार गरेपछि नेपालले वेस्टइन्डिज एलाई ६ विकेटले हरायो।

यो जितसँगै ५ खेलको सिरिज नेपालले ३–२ ले गुमाएको छ। नेपालले पहिलो खेल ४ विकटले जितेको थियो भने त्यसपछिका लागतार तीन खेल वेस्टइन्डिजले १०, ७६ र २८ रनले जितेको थियो।

१७३ रनको लक्ष्य नेपालले ७ बल बाँकी छँदै ४ विकेट गुमाउँदै भेट्टायो । नेपालका अनिलले सर्वाधिक ५८ रन बनाए। उनले ४५ बलमा समान ४ चौका र छक्का प्रहार गरे।

यस्तै, आसिफ सेखले ५१ रन बनाए। उनले ३५ बलमा २ चौका र ५ छक्का प्रहार गरे। यो सिरिजमा कप्तान रोहितकुमार पौडेलपछि यी दुईले मात्रै अर्धशतक बनाएका छन्। अनिल र आसिफले दोस्रो विकेटका लागि ९६ रनको साझेदारी गर्दै नेपालको जितको आधार खडा गरे।

अन्त्यतिर कुशल मल्लले पनि विस्फोट ब्याटिङ गरे। उनले १८ बल खेल्दै समान ३ चौका र ३ छक्का प्रहार गर्दै ३७ रन बनाए। उनले ओबेड मकोइको १८औं ओभरमा २२ रन बनाएका थिए।

बलिङमा वेस्टइन्जिका मकोइले ३ तथा म्यथ्यु फोर्डले १ विकेट लिए।

त्यसअघि टस जितेर पहिला ब्याटिङ गरेको वेस्टइन्डिज एले निर्धारित ओभरमा ७ विकेटको क्षतिमा १७२ रन बनायो।

वेस्टइन्डिज एका लागि एलिक एथानाइजले सर्वाधिक ४२ रन बनाए। उलने २९ बलम १ चौका र ३ छक्का प्रहार गरे। यस्तै, कप्तान रोस्ट चेसले ३३, जोन्सन चार्ल्सले २४ र म्याथ्यु फोर्डले २३ रन बनाए।

वेस्टइन्डिजलाई थोरै योगफलमा रोक्ने क्रममा सोमपाल कामीले उत्कृष्ट बलिङ गरे। उनले ४ ओभरमा १६ रन मात्र खर्चेर २ विकेट लिए। यस्तै, सागर ढकालले २ ओभरमा १७ रन खर्चेर ३ विकेट लिए। अर्को विकेट अविनाश बोहराको नाममा रह्यो।

साभार : काठमाडौं प्रेस