धनुषामा क्रसरको फित्तामा बेरिएर एकको मृत्यु, एक घाइते

2 वर्ष पहिले प्रकाशित

Esandhyakalin

जनकपुरधाम,जेठ १० गते । धनुषामा सञ्चालनमा रहेको एक क्रसरमा उद्योगमा ढुङ्गा फोड्ने फित्तामा बेरिएर एक जना युवकको मृत्यु भएको अवस्थामा शव फेला परेको छ ।

धनुषाको गणेशमान चारनाथ नगरपालिका वडा नंं ६ मा सञ्चालनमा रहेको कमला स्टोन क्रसरमा युवकको शव ढुङ्गा फोड्ने मेसिनको फित्तामा भेटिएको प्रहरीले जनाएको छ ।

मृत्यु हुनेमा गणेशमान चारनाथ नगरपालिका वडा नंं ६ गोदरका वर्ष २० को अर्जुन यादवको शव फेला परेको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक रञ्जन अवाले जानकारी दिनु भएको छ ।

मजदुरका रुपमा काम गर्ने यादवको राति ढुङ्गा फोड्ने मेसिनको फित्तामा टाउको च्यापिएको अवस्थामा शव फेला परेको प्रहरीले जनाएको छ । यसै गरि सोही क्रसरमा काम गर्ने बाराक निजगढ बस्ने वर्ष ४५ को खेमकुमार मगर घाइते भएको प्रहरी नायव उपरीक्षक अवाले जानकारी दिनु भयो ।

मृतकका मामा खुसीलाल यादवले घटना हत्या हुन सक्ने शङ्का रहेको दाबी गरेका छन् । घटनापछि क्रसरका सञ्चालकहरू फरार भएको पीडितले जानकारी दिँदै यसको प्रभावकारी अनुसन्धानका लागि माग गरेको छ ।

यसै बीच मृतकको शव परीक्षणका लागि प्रादेशिक अस्पताल जनकपुरधाम पठाउने काम भएको ईलाका प्रहरी कार्यालय ढल्केवरले जनाएको छ ।

साभार : रेडियो नेपाल