सरकार र यातायात व्यवसायीबीच १४ घण्टाकाे वार्ता निष्कर्षविहीन, मंगलबार बिहान पुनः बस्ने

11 महीना पहिले प्रकाशित

Esandhyakalin

काठमाडाैं ,जेठ १९ गते । सरकार र नेपाल यातायात व्यवसायी राष्ट्रिय महासंघको आजको दोस्रो वार्ता निष्कर्षविहीन बनेको छ । भौतिक पूर्वाधार तथा यातायात मन्त्रालयका सहसचिव कृष्णराज पन्थको नेतृत्वमा गठन भएको वार्ता टोली र व्यवसायीबीचको १४ घण्टाकाे वार्तामा सहमति जुट्न नसकेकाे हाे ।

मुख्य गरी गण्डकी प्रदेश सरकारले ल्याएको राइड सेयरिङ सञ्चालन सम्बन्धी नियमावली संघको ऐन नआउँदासम्मका लागि स्थगित गर्नुपर्ने व्यवसायीको मागमा सरकार तयार नहुँदा वार्ता सफल हुन सकेन ।

यातायात महासंघका महासचिव भरतराज नेपालले गण्डकी प्रदेशले ल्याएको नियमावली स्थगित गर्ने कुरामा सरकारी पक्ष तयार नहुँदा वार्तामा सहमति जुट्न नसकेको बताए ।

‘हामीले मुख्य गरी गण्डकी प्रदेश सरकारले ल्याएको नियमावली संघीय ऐन नआउँदासम्मका लागि स्थगित गर्नुपर्ने माग राखेका हौं’, उनले भने, ‘उहाँले यो काम हामीबाट हुन सक्दैन । माथिल्लो निकायबाट पहल गर्नुपर्छ भनेपछि वार्ता स्थगित भयो ।’

पुनः भोलि बिहान १० बजेका लागि वार्ताका लागि बोलाइएको महासविच नेपालले बताए । ‘हाम्रो मागप्रति सरकार तयार भए राति पनि वार्ता हुन सक्छ । नभए भोलि बिहान १० बजे पुनः बस्छौं,’ उनले भने ।

गण्डकी प्रदेश सरकारले ल्याएको राइड शेयरिङ सञ्चालनसम्बन्धि नियमावलीको खारेजीको माग राख्दै यातायात व्यवसायीले शुक्रबारदेखि सार्वजनिक यातायात ठप्प पारेका छन् । उनीहरुले आजदेखि देशैभर सार्वजनिक यातायात बन्द गरेका छन् ।

साभार : नेपाल प्रेस