मानव अधिकार प्रवर्द्धनका लागि युवाको सक्रियता आवश्यक : Amnesty Youth-57

3 महीना पहिले प्रकाशित

Esandhyakalin

जनकपुरधाम, असार २० गते। अन्तर्राष्ट्रिय मानव अधिकार संस्था Amnesty International Youth-57 जनकपुरधाम समूहको ३५औँ साधारण सभाबाट क्लोथ बैंक नेपालका सचिव मनिष झा श्रीओम अध्यक्ष (संयोजक) मा सर्वसम्मत निर्वाचित भएका छन्।

जनकपुरधामस्थित होटल फलसममा शनिबार सम्पन्न साधारण सभामा Amnesty International Nepal का पूर्व अध्यक्ष शम्भू ठाकुर प्रमुख अतिथि तथा समूहका संयोजक कमल साहको अध्यक्षता रहेको थियो।

सभाले समूहको आर्थिक तथा सांगठनिक प्रतिवेदन सर्वसम्मतिले पारित गर्दै आगामी दुई वर्षका लागि नयाँ कार्यसमिति चयन गरेको हो।

नवनिर्वाचित कार्यसमितिमा उर्मिला यादव उपाध्यक्ष (सह–संयोजक), अम्बिका प्रसाद कर्ण सचिव, मुकेश ठाकुर कोषाध्यक्ष तथा फूलकुमारी साह, कैलाश प्रसाद, उदयचन्द्र यादव, सञ्जय प्रसाद साह र शिवशंकर मिश्र सदस्यमा निर्वाचित भएका छन्।

यसैगरी, कमल साह, डा. विनय कुमार झा र रमेश कुमार साह सल्लाहकार समितिमा चयन भएका छन्। प्रदेश प्रतिनिधिमा कमल साह र उर्मिला यादव चयन भएका छन्।

कार्यक्रममा बोल्ने वक्ताहरूले मानव अधिकारको संरक्षण, लोकतान्त्रिक मूल्य–मान्यता तथा युवाको सक्रिय सहभागिता अभिवृद्धिमा संस्थाले अझ प्रभावकारी भूमिका खेल्नुपर्नेमा जोड दिएका थिए।

Amnesty International विश्वका १५० भन्दा बढी देशमा सक्रिय मानव अधिकारसम्बन्धी अग्रणी संस्था हो। संस्थामा एक करोडभन्दा बढी सदस्य तथा समर्थक आबद्ध रही मानव अधिकारको संरक्षण र प्रवर्द्धनका लागि विभिन्न अभियान सञ्चालन गर्दै आएका छन्।