माघ १६ मा जेनजी सहिदको सालिक अनावरण गर्न खरेलको आग्रह

2 घन्टा पहिले प्रकाशित

Esandhyakalin

काठमाडौं, भदाै २४ : राष्ट्रिय स्वतन्त्र पार्टी (रास्वपा)का प्रवक्ता तथा सांसद जगदीश खरेलले सातदोबाटोस्थित सहिद पार्कमा निर्माण गरिएको जेनजी सहिदको सालिकको अनुहार नमिलेपछि उद्घाटन स्थगित गरिएको बताएका छन्।

सालिकको अनुहार सहिदका आफन्त तथा परिवारले नमिलेको गुनासो गरेपछि तत्काल उद्घाटन गर्नुभन्दा आवश्यक सुधार गरेर मात्रै अनावरण गर्नु उपयुक्त हुने उनको भनाइ छ।

बुधबार सञ्चारकर्मीसँग कुरा गर्दै खरेलले तत्कालीन सरकारले जेनजी सहिदहरूको स्मृतिमा पार्क निर्माण गर्ने निर्णय गरेको र निजी क्षेत्रको सहयोगमा निर्माण प्रक्रिया अघि बढाइएको बताए। तत्कालीन मन्त्री बब्लु गुप्ताको सक्रियता तथा आफ्नो सहयोगमा पार्क निर्माणको काम सुरु गरिएको उनले जानकारी दिए।

उनका अनुसार पार्कको जग खन्नेदेखि संरचना निर्माण र डिजाइन निर्धारणसम्मका करिब ६० प्रतिशत काम यसअघि नै सम्पन्न भइसकेको थियो। तर सहिदका सालिकहरू अन्तिम रूप दिने काम भने बाँकी रहेको उनले बताए।

खरेलले सहिदका परिवार तथा आफन्तको सहमति र सालिकमा सहिदको अनुहार मिल्नु महत्वपूर्ण भएकाले अहिले हतार गर्न नहुने बताए।

‘सालिक त मिल्नुप¥यो नि, जो सहिद हो भन्ने हिसाबले। त्यसैले अहिले हतार नगरौँ,’ उनले भने।

उनले माघ १६ गते पर्ने सहिद दिवसलाई लक्षित गरेर सालिकको अनुहार मिलाउने तथा पार्कको बाँकी फिनिसिङको काम पूरा गर्न सुझाव दिएका छन्। त्यस अवधिमा पार्कलाई थप आकर्षक बनाउँदै जेनजी पार्क तथा सहिद पार्कमा आएको अनुभूति हुने गरी विकास गर्न सकिने उनको भनाइ छ।

खरेलले पाटनमा निर्माण गरिएको जेनजी सहिद विनोद महर्जनको सालिक उदाहरणीय बनेको उल्लेख गर्दै सातदोबाटोमा निर्माण भइरहेका सालिक पनि त्यस्तै आकर्षक र सहिदको वास्तविक अनुहारसँग मिल्दोजुल्दो बनाउनुपर्ने बताए।

पार्क निर्माण कुन प्रक्रियामार्फत अघि बढाइएको थियो भन्ने विषयमा भने उनले तत्कालीन मन्त्री बब्लु गुप्तालाई नै जानकारी रहेको बताए। उनले पार्क ठूलो आयोजना नभएको र अधिकांश संरचना तयार भइसकेकाले सालिकको अनुहार मिलाउने तथा केही फिनिसिङको काम गरेपछि पार्क आकर्षक बन्ने दाबी गरे।

ललितपुरमा पार्क निर्माण हुनुको कारणबारे उनले ललितपुर आफ्नो निर्वाचन क्षेत्र तथा जिल्ला भएको र स्थानीय तह तथा सम्बन्धित खेलकुद निकायले समेत सदाशयता देखाएकाले पार्क निर्माण सम्भव भएको बताए।

सहिद पार्क तथा जेनजी सहिदको स्मृतिसँग जोडिएको कार्यक्रममा सहभागी हुने विषयमा उठेको प्रश्नमा खरेलले सहिद सबैका साझा हुने भएकाले श्रद्धाञ्जली तथा स्मरणका कार्यक्रममा जोसुकै सहभागी हुन सक्ने बताए।

साभार ः काठमाडौं प्रेस