गृहमन्त्री गुरुङ निजगढ पुगेर मिटरब्याज पीडितहरूसँग प्रत्यक्ष संवाद सुरु, ६ बुँदे माग सम्बोधन गर्न दबाब

4 महीना पहिले प्रकाशित

Esandhyakalin

रौतहट, असार ३० : मिटरब्याज पीडितहरूको समस्या समाधानका लागि सरकारको तर्फबाट पहल कदमी सुरु भएको छ।

जनकपुरबाट काठमाडौँ केन्द्रित आन्दोलनका लागि पैदल यात्रा गरिरहेका पीडितहरूलाई भेट्न र उनीहरूका समस्याबारे प्रत्यक्ष संवाद गर्न गृहमन्त्री सुधन गुरुङ बाराको निजगढ आइपुगेका छन् ।

बुद्ध एयरको विमानमार्फत सिमरा विमानस्थलमा अवतरण गरेलगत्तै गृहमन्त्री गुरुङ सडक मार्ग हुँदै सोझै निजगढ पुगेका हुन्। निजगढमा शिविर बनाएर बसेका आन्दोलनरत पीडितहरूसँग मन्त्री गुरुङले प्रत्यक्ष छलफल र अन्तर्किया सुरु गरिसकेका छन्।

लामो समयदेखि न्यायको खोजीमा सडक संघर्ष गरिरहेका नागरिकलाई राज्यका तर्फबाट अभिभावकत्व दिन मन्त्री आफैँ मैदानमा उत्रिएपछि यो भेटवार्तालाई राजनीतिक र सामाजिक वृत्तमा निकै चासोका साथ हेरिएको छ।

आफ्नो जायजेथा र उठिबास गराउने मिटरब्याजी (सामन्ती) प्रथाको समूल नष्ट हुनुपर्ने अडानमा रहेका पीडितहरूले सरकारसमक्ष स्पष्ट खाकासहित ६ बुँदे माग अघि सारेका छन्।

उनीहरूले सरकारसमक्ष फर्जी लिखत खारेज, विशेष ऐन निर्माण, न्यायाधिकरण गठन तथा पीडितको सम्पत्ति फिर्ता गर्न माग गरेका हुन्। छलफलका क्रममा गृहमन्त्री सुधन गुरुङले पीडितहरूका समस्या र मागप्रति सरकार गम्भीर रहेको र यस प्रथालाई कानुनी रूपमै अन्त्य गर्न गृह मन्त्रालयले गृहकार्य गरिरहेको आश्वासन दिएका छन्।

यद्यपि, पीडितहरूले भने विगतमा पनि पटक–पटक सहमति भएर कार्यान्वयन नभएको भन्दै यसपटक ठोस र लिखित निर्णय नभएसम्म आन्दोलन र यात्रा नरोक्ने अडान राखेका छन्।

साभार ः काठमाडौं प्रेस